الشجن المهاجر

اهــــــلا وسهـــــلا
الشجن المهاجر

ست شموس الكون منايه

المواضيع الأخيرة

» ادريس محمد جماع/ ديوان ( لحظات باقية) 2
السبت 7 أبريل - 12:05 من طرف Admin

» ادريس محمد جماع ديوان ( لحظات باقية)
السبت 7 أبريل - 11:50 من طرف Admin

» محمد علي كلاي
الثلاثاء 29 ديسمبر - 12:27 من طرف ذكي سيد احمد

» أنيس منصور
الأربعاء 18 نوفمبر - 21:13 من طرف Admin

» بيتر ألتنبرغ
الأربعاء 18 نوفمبر - 21:05 من طرف Admin

» أندريه موروا
الأربعاء 18 نوفمبر - 21:03 من طرف Admin

» أنت مثل جميع من في الكون، تستحق حبك وعاطفتك. "جوتاما بوذا"
الأربعاء 18 نوفمبر - 20:54 من طرف Admin

» غروشو ماركس
الأربعاء 18 نوفمبر - 20:49 من طرف Admin

» ونستون تشرشل
الإثنين 16 نوفمبر - 14:08 من طرف Admin


    ازهري محمد علي

    شاطر
    avatar
    Admin
    Admin

    المساهمات : 257
    تاريخ التسجيل : 06/09/2014
    العمر : 36
    الموقع : السودان
    20102014

    ازهري محمد علي

    مُساهمة من طرف Admin


    مـــعـــاى

    بحبـــــــــــك بحـــــــــــــــــــــــر

    وغشيتك أسلم عليك
    أتكّل قصادك
    هموم الحراز
    أطمّن طيوف الخريف الوشيك
    أبشر دواخلك بوعد الرزاز
    مودر ملامحك
    غبيتك
    لقيتك
    بتلفظ شوارعك بيوتك
    تصادر خطاك وتكاجر مشيك
    تغالط حواسك ملامحك
    وتحرد عيونك مقاطع وشيك
    سألتك خبارك ؟!
    مسُوكر لسانك
    ! وصمتك يشفق
    خبارك ! بتغرب شموسك
    زمان الشموس البتشرق
    تضيع الملاحه التعطن وجيهك
    ومّنك تدفق
    ! خبارك غريبة
    أقلب دواخلك
    أكوس الحبيبة اللى عنك بتفرق
    بتفرق حبيبتى البتلبس فصول الخصوبة
    بتضحك أغانى
    وتدفق عذوبة وبتنزل مطر
    عشقتك لأنك حبيبتى
    وبحبك بحر
    عشقتك لأنك خواتم الحقيقة
    وطريق الوصول لأنك بداية الخليقة واساس القبول
    أحيّى الغيوم البتفطم ذبولك
    ترضع سهولك ، مواسم الهطول
    واحيّي المدائن البتفتح حدودا
    وتمنح عيونك جواز الدخول

    يزيد خيرك
    ولا طابت بلاك عيشة
    مقسمة إنت فى غيرك
    مقسمة فيك ما فيشه
    ومخيم ليلك العسعس
    لا برقن بروق صحوك
    لا صبحك رضى اتنفس
    يحندك فى العطش غيمك
    تمطري إنت فى الخاطر
    وتنفضي من دواخلى العس
    بديت أتسامى للآخر
    رميت توب البيات الرث
    قويت إتيقنت روحي
    وسقط منى الكلام الغث
    أنا الدّاخرك بصيرة وشوف
    يا بقعة ضو
    فى عتمة قلبى المحفوف
    ومسربل فى بالشتا والليل
    والخوف
    فارغة ومليان بيك
    وضيقه عليك البشره
    أنا غيبتك بينى وكنتك
    زمَلتك فى الخاطر بُشرى
    مزَقت ستار الجلد الهش
    وطلعتى من الجسد القشرة
    تاوقت
    لقيتك فينى النفس الكاملة
    تتوقى اليابسة
    والنهر فى إيدك صلصال
    يتسارق ضوَك خافت
    متهافت نحوك أجرى
    مهرول راكض
    سابقت خُطاى وحدقتك
    غيمة .. وضل .. وبُحيره
    ضاريتك بينى وضاريتك
    من الحزن القابض
    نفسى وروحى واقف عارض
    ستفت عيونك بالمطرة
    وقرحتك ضد الزمن الراكض
    وحدقتك حبيبتى
    البتشبه فصول الخصوبه
    تضحك أغانى وتدفق عذوبة
    وبتنزل مطر
    عشقتك لأنك حبيبتى
    وبحبك بحر .
    Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven





    يا زوله..

    الصوت الطالع منِّى

    بِدِّي مسامعِكْ راسْ الخيط

    والشوْفْ البِحسِبْ

    حَبّ الرَّمل التِحْتِكْ

    بِعْرِفْ رنَّة ضحكِكْ

    رقم الهاتف

    وشارع البيت

    والخوف البِفْضَح صمتي

    بِعرفِكْ إنتى

    يعلم إنِّي

    مانى المالي هُدومي

    ومافي الجُبَّهِ

    إلاَّ إنتي..

    زوله..

    وكاكاو الدم الفيكْ

    مين السّماكِ سِفاح

    مِنْ رِحِم أبنوسه ونخله

    مين الورّاك إفراز الشهد

    وأدَّاكِ مذَاقْ مِن ريق النحله

    كضّابه الغابه القالَت

    تَشتِلْ أنْناسَه على الصحرا

    كضّابه القلتى حتفصلِّى توب العِيد للَهَلهْ

    كضّاب القلتَ ملْحوقه خطاوى المَهَلَه

    يا زوله..

    مخنوقه الشهقه الفي رئتي اليمنى

    محمومه خلايا الدم والزفره

    مهمومه شِعاب القفص الصدري

    مَمْحوقه حُلول الشفره

    مفقود مُفْتاح الباب السرِّى

    !تذكَّرْ

    وين لاقيتَكْ صدفه؟

    قالتلى - حبيبة القلب الأولى

    والفرح المُعْلَن مدسوسْ

    دسيتْ على رِحم الذاكره النُطفه

    فى هذا الزمن السوس

    إتْرَفَعَتْ بيناتنا الكُلفه

    غنيتِكْ نَخله وأبنوسْ

    ومَشيِتكْ متقرّب لعيونمِكْ زُلفى

    !تذكَّر وين لاقيتك صدفه

    !أذْكُرْ كنَّا عناصر شتّى

    إكتملتْ بينَاتْنا العِفَه

    والصيف الاذِع شتَّا

    صَفَق النِيم إتساقَطْ حَتَّ

    طَرْفَه لَمَحتِكْ

    شِلْتَ النفَسَ

    الأبى يتْخَتَّ

    يضْحَكْ صَحْوك

    نوّر كل مناحي الحِتَّه

    وما اتسائلتَ عن اسمِك حَتّى

    إتلمينا عليكِ وبَغْتَه

    دسّيِنَاك من خَفَر الليل

    فسّحناك المليون ميل

    صَرّينا تُراب أقدَمِكْ فى مِنْديل

    وشَهلنَاكِ هُتاف

    ومديحْ

    وصهيلْ

    وقدمناك قُربان للنيل

    وكان من عِنْدكِ بَدَت لصحوه

    جيِتك مِنِّكْ

    شادِّى خَيال الشوق الصهوه

    بَدينا نفلِّى الروح

    مِنْ نَزَقَ الشهوه

    وإترجّلتَ بفعل النخوه

    جلسنا نخمِّس فنجان قهوه

    إتشاركنا الزاد والمقْعَد

    فَتَحنا ملف الزمن الأبْعَد

    قام الفرح الطوّل مُقْعَدْ

    لا قيناكْ دلوكه ودبكه

    إتسالمنا سلام غُبار السِكّه.



    !زوله

    وكاكاو الدم الفيك

    !مين السمَّاكِ سِفاح

    Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven




    الخـــروج من بيت النمــــــــــل

    تمى غناك الخمجان
    وزودى إيقاع الرقص
    ومحل ما تمدى إيدك
    أنزلى أمطار
    وريحى أعصاب الطقس
    مدستر فيك الزول الجواى
    ومنك أول زول
    نازل دستوروا معاى
    أول زول صالحته لوجه الأرض
    كان منك
    آخر زول ناهر خوفى
    وعارف معنى الرفض
    كان منك
    يا متوهطة حلم الكل
    ومعلنة إنك ضد البعض
    أنا راغب أستخلص عذبك
    من بحر الشك المالح
    أسقيك حليب الروح
    أكسيك من عُري الزمن الفاضح
    يا وحم العشق المحموم
    ومخاض الجرح الفادح
    أنا ليه قدامك .. دون
    وعدتك نمشى نخصب حلم المويه
    بوعد الرمل
    رجعنا نكلم حلم المويه
    برفض الرمل
    وقعدنا بنقطع فى المويه وفى الرمل
    سرقوك منى ودسوك
    فى بيت النمل
    طراك الصهيل حس الصرير فى بابى
    أنا عازمك مقيل ومخصمك ما تابى
    خليهو العويل كان يسترك جلبابى
    يا جدية العُزاز ما بلحقك نشابى
    فى الوادى الفسيح مرقت براها كلابى
    فزت فى القنيص صدّن بلاها كلابى
    أدتنى السلام سلمتها السبابى
    حنت للرحيل رحلت مع الجلابى
    وحّيدا الكتيل كتل المنخلع للدابى
    ويا خيه .. كل البراحات وسوسه
    الهاويه خلفك والبحر
    وقدمك طنين الهلوسه
    محمدك ساساق دروب الهم
    محمدك .. طول المدى الشاسع
    بين الإيدين والفم
    ويا إنتى العشم مزبوح
    أدسك فى خلايا الدم
    تمرقى بى خراج الروح
    حمل كاذب رعد أبكم
    حبل متروك على القارب
    واشوفك فى الحصار باهته
    نتف غضب العُصار ريشك
    حتل فيك الكلام الرخو
    نقز فى دمى درويشك
    واظنك إنتى
    غشاك الشعور بالزهو
    سقط سهواً غناك الكان
    بكلب جلدة الغفوة
    وينفذ من مسام الصحو
    لكنك بتطلعى من حوافر الخوف
    تطلعى من حلم مهووس
    ومن فجة سفر طول
    يسربك الحنين فينى
    تعلنى عن زمن آتى
    تعلنى عن وطن أجمل


    Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven




    جرحت ليه خاطر الحبيبة ؟

    الحبيبة
    المشطت عصب التضاريس
    وهدت على كل الخرايط .. والفراغات
    مدهونة بى لونا أرصفة المحطات
    واقده من ريقا الفوانيس
    جرحت ليه خاطر الحبيبة
    دى السكة أبعد من حدود الإحتمال
    والجرح أعمق من بكا الليل والنويح
    ويوم استفزت قدرتك
    قيمة المسافات
    عرفت إنك قليل حيله وفصيح
    ستفت عمرك فى حقايب الرجعه
    للسفر القديم
    مرقت تشهل غربتك
    وبى توبا تستر عورة الزمن اللئيم
    ماهى دى الحبيبة
    الشحتفت روحى
    ومعطنه فى ينابيع الألق
    الشاربه من فجر الشروق
    وما خده من لون الشفق
    ما هى دى الحبيبة
    الداخله من بين مسامات العرق
    رقراق
    وطالعة زى قمر الدُجى
    وسايقانى فى كل الدروب ساساق
    راميانى حد القريفه
    وقاليانى زى قهوة بجا
    ما هى دى الحبيبة
    يومى المشيت مجبور
    علي السكة المريبة
    أدتنى إحساسا الرطب
    وشهرت ضحكتا العذبة ومشت
    كانت رؤاها بتحتشد
    زى نار
    بتسجن روحها فى عود الثقاب
    وتعهلن مهرجانات الحريق
    لو كشت الواطة ولقيتا
    ما كنت ضليت الطريق
    ودفقت مويتى على الرهاب
    مشيت ورا الشدر اليمامه
    دى الرتبت خدر الحنين
    فى الروح وعبت دوار النشوه
    فى جسد الندامه
    وانا كنت مفتون
    بى تداعى اليابسه
    فى عرس التساب
    مشدود على حبل الصعود أفل
    مشلهت بالأيادى الفوق
    مشهلت والبدن منحل
    لفحت من الأرض طرقه
    مرقت على البحر شاشوق
    لقيت توب البحر خرقه
    لقيت درب الرجوع أطول
    هيا يازولة
    المخارج وين ؟
    لا غلت يداك عن حل
    غلبت فى الحيل البلمك
    من حبال الصوت
    وبندهلك تعالى .. تعالى
    ما وردت مرحاكه البيوت الناشفه
    ساساقك عبث
    شن قدرتك تنسلى
    من قلب الضلمه الحالكه خنجر
    من قبس
    من وين أجيبلك
    قدرة تستلهم رؤاك
    وانا جاى من وحشة سنينى
    المرة
    بى آخر نفس
    من .. وين .. ؟؟
    أجيبلك قدره بس
    من وين
    وانا هد احساسى السفر
    أنا بندهك لو مره
    ضفه اتبرجت
    حلت ضفاير للبحر
    بندهك لو لبش الموج فى الطمى
    والشاطئ فى ذروة
    المد انكسر
    وأنا بعزمك على مويه
    عذبة وضل وريف لو هم سقط
    من طاقه فى حلم الحبيبه
    وانتحر
    جرحت ليه خاطر الحبيبه .


    Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven





    يا مشرع الحلم الفسيح
    أنا بينى مابينك جزر
    تترامى .. والموج اللّديح
    القدرة والزاد الشحيح
    كملتو .. ما كِمل الصبر
    نتلاقى فى الزمن المريح
    ميعادنا فى وش الفجر
    يا مشرع الحلم الفسيح
    ***************
    يا مشرع الحلم الفسيح
    يا بعض منى .. وفينى ساكن
    أنا أصلى منك ومشتهيك
    و بيناتنا ليل الغربة ... داكِنْ
    هبّة هبوبك..
    أفتح شبابيك المساكن
    وسـِّع دروبك ..
    ولـِّع مصابيح الأماكن
    يا مشرع الحلم الفسيح
    *************
    يا مشرع الحلم الفسيح
    يومنا النـّهِـبْ .. أسلِبنا خوفنا
    كبـِّرنا قدرك .. مرتين
    وطـِّول قدر كتفك .. كتوفنا
    يا رغبة الرعد البيسكن ..
    بين غناوينا وحروفنا
    ضوِّى الدساكر والضفاف
    عبِّى الحناجر بالهتاف
    سدِّد مسامات الرِّعاف
    نوِّر مغاراتنا وكهوفنا
    *******************
    يا مشرع الحلم الفسيح
    أنا وإنت .. والمطر الفصيح
    حانطوِّع الزمن القبيح
    نأخد بعض .. شكل السما
    حدِّثنى دايماً .. كلما
    تنشف على البر الضفادع
    يهجر الضو المواضع
    وتسقط من الكف الأصابع
    حدثني دايماً كلما
    تحرد مراسيك السفن
    تسكن مرافيك الزعامات .. الدُمى
    حدثنى لو تاهت خطانا ..
    على الدروب المبهمة
    أو ربما..
    تهدم آلات الشوارع ..
    وترجمْ العُزّى الصواقِع
    حدثنى لو مطرك همى ..
    حدثنى لو صادف الكى المواجع
    وضلك على الساحل رمى
    حدثنى لو مطرك همى
    علمنا دايماً كلما
    نبذر على أرضك شهيد
    يطلع شمس ..
    يبهر بأنوارو السما

    يا مشرع الحلم الفسيح


    Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven  Like a Star @ heaven

    مُشاطرة هذه المقالة على: diggdeliciousredditstumbleuponslashdotyahoogooglelive

    لا يوجد حالياً أي تعليق


      الوقت/التاريخ الآن هو السبت 21 أبريل - 20:33